Jean Haritschelhar euskaltzain nafarra,
seigarren merindadekoa
Hala ere, uste dut ez naizela batere oker
ibiliko erraten badut bertze berezitasun aipagarri batzuen eraginez dela hagitz
ezaguna eta gogoko Nafarroa Behereko Jean Haritschelhar gure artean ere,
hemen Nafarroa Garaian. Euskaltzainburu izan den urte luzeetan, batik bat,
bisitari eta parte hartzaile izan dugu maiz aski Nafarroan, hiriburuan ez ezik
bertze hainbat herritan ere, hasi Beratik eta Tuteraraino, harreman
instituzionaletan, ekitaldi akademikoetan, ageriko ekitaldietan edota zenbait
bilera eta bisitatan. Planta ederreko gizon errespetagarria izateaz gainera,
beti atsegin, irribarretsu eta gozo agertu zaigu Jean, jendearekiko hurbila eta
agerraldi akademikoetan hizlari adierazkorra, entzuleen arreta erraz
bereganatzea lortzen duen komunikatzaile bikaina.
Mundu akademikoan entzute aitortua duen
irakasle euskaltzaina, aldi berean, herriari lotua ikusi dugu, ez bakarrik
bederatzi urtez bere sorterriko alkate edota bertze urte anitzez Pilotarien
Biltzarreko kide eta zuzendari karguetan egona delako. Izan ere,
euskaltzainburu izan denean maisuki erakutsi du erakundea gizarte maila
guztietan ordezkatzen, bai goi mailako herri aginteekiko harremanetan, bai
herri eta jende xumeekikoetan ere.
Bere burua “izatez nafarra eta politikoki
frantziar hiritarra” definitzen duen Jean Haritschelhar euskaltzainburu ohia,
Nafarroako seigarren merindadeko Baigorrikoa da, mugaz haraindiko eta honaindiko
nafarrok, muga kontuak gaindituz, urtero udaberrian Nafarroaren eguna
elkarrekin ospatzen dugun herrikoa, hain zuzen ere.
Andrés Iñigo
Euskaltzandiaren Nafarroako ordezkaria
No hay comentarios:
Publicar un comentario