Sakanatik eskerrak emanik
Arantxa Amilibia
Adimentsua, baina argia; zorrotza,
baina bihozbera; zehatza, baina ulerkorra; sendoa, baina sentikorra. Jose Mari
Satrustegi Zubeldiak bi aldeak ditu; garapen maila handia eskuratu duten
gizakien antzera.Herri eta kultura baten parte sentitzen
da. Europako hizkuntzarik zaharrena hitz egiten duen herriko kidea da.
Aspalditxo konturatu zen bera gure kulturak bultzadatxo bat behar zuela gizarte
modernoaren globalizazioan desitxuratuta gelditzeko arriskuaren aurrean.
Euskaldun zaharrak euskaraz solastu nahi ez zutenean, gure hizkuntzaren
aberastasuna aldarrikatu eta zegokion tokian euskararen eta euskal kulturaren
alde hainbat lan egin zuen gure nortasunaren izaeraren muinoak ‘lotsarik’ gabe
lau haizetara zabaltzeko.
Urmenetaren eraginez eta Pedro Diez de Ulzurrun
sendagilearen zuzendaritzaz euskaltzale taldean parte hartu zuen Frankismoaren
garaian. Orduko lanen artean ondoko hauek daude: haur euskaldunen sariak;
Principe de Viana euskal aldizkaria eta eskoletan ordu erdiko euskara sartzea.
Ahaleginak ez ziren hor eten: 1969an Fontes Linguae Vasconum agitalpena sortu
zuen, mundu zabaleko euskaltzaleei irekia eta orain arte, zuzendari jarraitzen
du. Ordukoa da ere Cuadernos de Etnologia y Etnografia, Etniker taldearen lanak
argitaratzeko aldizkaria.
Ikastolak abiatu zirenean hainbat
ekimenetan parte hartu zuen belaunaldi berriak euskaraz ikas ahal izateko.
Horrekin batera itzultzaile lanak egin zituen haurrendako hamaika ipuin
euskaratuz: Ardo ta ogi Martxelin, Alizia, Laminzulo... Hainbat euskaltzaleren
biografiak osatu ditu: Bordel bertsularia, J.F. Aizkibel, Alexander Tapia
Perurena, Perpetua Saragueta... Eta hamaika libururen egilea dugu; bai euskaraz
Luzaideko kantiak, Eusladunen seksubideak, Ekaitza, Ipuin miresgarriak, Axelko
eta Osoko, Lapur Zuriak, Sakanerri barrena, Mattin Motela...; bai erdaraz:
Mitos y creencias, Comportamiento sexual de los Vascos, Solsticio de Invierno,
Antropologia y Lengua... Horiez gain, mila eta ehunen bat idazlan aldizkari,
elkar arteko liburu eta hitzaurre idatzi ditu. Euskaltzaina, Intstituto
Americano de Estudios Vascos (Buenos Aires) eta Academy Linguistic
International-eko (Erevan, Armenia) ohorezko partaidea, besteak beste.
Sakanako arruazuarra erretiratuta bizi
zen, hala ere, azken ordura arte, emanari oneko iturria izaten jarraitu du
hamaika proiektu eta egitasmo bultzatuz. Ez da erraza sakandar honen lana lau
hitzetan laburbiltzea, baina, zalantzarik gabe, apaiz honek egindako lana ez da
errez ezean geldituko. Apaltasunez aipatu zuen egun batez: “Geroz eta gutxiago
dakigula konturatzen naiz”. Hala ere, berak egindako lan mardulari esker, gure
zurtoin sendoa gero eta sendoagoa eginen da. Eskerrik asko Jose Mari!
No hay comentarios:
Publicar un comentario